Nashik Rain Kumbh road work traffic congestion
नाशिक | MHDU News
नाशिकमध्ये झालेल्या पहिल्याच मुसळधार पावसाने शहरातील रस्ते विकासकामांच्या नियोजनावर गंभीर प्रश्नचिन्ह उपस्थित केले आहे. आगामी सिंहस्थ कुंभमेळ्याच्या पार्श्वभूमीवर विविध भागांमध्ये सुरू असलेल्या रस्ते खोदकामांमुळे अनेक मार्गांची अवस्था बिकट झाली असून, पावसामुळे हे मार्ग चिखलमय आणि धोकादायक बनले आहेत.
अनेक ठिकाणी वाहनांची चाके चिखलात रुतल्याने वाहतूक विस्कळीत झाली. काही भागांत वाहनचालकांना मोठ्या अडचणींचा सामना करावा लागला, तर प्रमुख रस्त्यांवर वाहतुकीचा वेग पूर्णपणे मंदावल्याने लांबच लांब वाहनांच्या रांगा लागल्याचे चित्र दिसून आले.
विशेष म्हणजे, ज्या ठिकाणी खोदकाम सुरू आहे त्या परिसरात सुरक्षिततेसाठी आवश्यक असलेले बॅरिकेड्स, इशारा फलक किंवा रात्री दिसतील अशा रिफ्लेक्टरची अनेक ठिकाणी कमतरता असल्याचे नागरिकांचे म्हणणे आहे. त्यामुळे विशेषतः रात्रीच्या वेळी वाहनचालकांना खड्डे आणि खोदलेले रस्ते ओळखणे कठीण जात असून अपघाताचा धोका वाढला आहे.
नागरिकांच्या मते, विकासकामे आवश्यक असली तरी त्याचे नियोजन आणि सुरक्षेच्या उपाययोजना याकडे पुरेसे लक्ष दिले गेलेले दिसत नाही. त्यामुळे पावसाने परिस्थिती अधिकच गंभीर केली असून वाहनांचे नुकसान, वाहतूक कोंडी आणि नागरिकांचा वेळ वाया जाण्याच्या घटना वाढत आहेत.
दरम्यान, पावसाळ्यात आपत्कालीन परिस्थिती हाताळण्यासाठी महापालिकेने विशेष यंत्रणा कार्यरत असल्याचे सांगितले होते. मात्र अनेक भागांमध्ये नागरिकांना तातडीची मदत किंवा परिस्थिती नियंत्रणात आणण्यासाठी आवश्यक हालचाली दिसून न आल्याची नाराजी व्यक्त होत आहे. (Nashik Rain Kumbh road work traffic congestion)
सततच्या पावसामुळे शहरातील काही सखल भागांमध्ये पाणी साचले असून काही निवासी परिसरांमध्ये पावसाचे पाणी घरांमध्ये शिरल्याच्या तक्रारीही समोर येत आहेत. हवामान विभागाने पुढील काही तासांमध्येही जोरदार पावसाची शक्यता व्यक्त केल्याने नागरिकांनी आवश्यक ती खबरदारी घ्यावी, तसेच प्रशासनाने तातडीने धोकादायक ठिकाणांची दुरुस्ती, पाणी निचऱ्याची व्यवस्था आणि सुरक्षेची उपाययोजना करावी, अशी मागणी नागरिकांकडून होत आहे.MHDU News : Vishal Bhadane Nashik Rain Kumbh road work traffic congestion
तलावमय परिसर, जीवघेणे खड्डे; मंजुरीनंतरही काम रखडल्याने नागरिकांचा संताप