Nashik Kumbh Works Controversy By BJP Corporator
नाशिक | MHDU News
सिंहस्थ कुंभमेळ्यासाठी सुरू असलेल्या विकासकामांच्या गुणवत्तेबाबत नाशिकमध्ये आता तीव्र नाराजी व्यक्त होत आहे. गेल्या २४ तासांत झालेल्या मुसळधार पावसानंतर शहरातील अनेक रस्ते खचणे, खड्डे पडणे आणि वाहतूक विस्कळीत होणे या घटनांमुळे कामांच्या दर्जावर गंभीर प्रश्नचिन्ह उपस्थित झाले आहे. या पार्श्वभूमीवर भाजपचे नगरसेवक दिनकर पाटील यांनी महापालिका प्रशासन आणि संबंधित कंत्राटदारांवर गंभीर आरोप करत संतप्त प्रतिक्रिया व्यक्त केली आहे.
सातपूर, शिवाजीनगर, पाथर्डी फाटा, अंबड लिंक रोड, नागपूर रोड तसेच त्र्यंबक रोड परिसरात अनेक ठिकाणी रस्त्यांची मोठ्या प्रमाणावर हानी झाली. काही भागांमध्ये पावसाचे पाणी साचल्याने वाहतूक ठप्प झाली, तर काही ठिकाणी कुंभमेळ्याच्या कामांमुळे खोदलेले रस्ते नागरिकांसाठी धोकादायक ठरले.
सातपूरमधील एका खड्ड्यात नागरिकांना मदत करण्यासाठी गेलेल्या भाजप नगरसेवक अमोल पाटील यांचा पाय फ्रॅक्चर झाल्याची माहिती सोशल मीडियावर व्हायरल झाली आहे. या घटनेनंतर प्रशासनाच्या कार्यपद्धतीवर आणखी प्रश्न उपस्थित होत आहेत.
नगरसेवक दिनकर पाटील यांनी आरोप केला की, सिंहस्थ कुंभमेळ्याच्या विकासकामांमध्ये मोठ्या प्रमाणावर अनियमितता झाली असून निकृष्ट दर्जाच्या कामांना काही अधिकारी पाठबळ देत आहेत. या निष्काळजीपणामुळे नागरिकांना मोठा त्रास सहन करावा लागत असून दोषींवर कठोर कारवाई झाली पाहिजे, अशी मागणी त्यांनी केली.
दरम्यान, मुसळधार पावसामुळे महापालिका मुख्यालयासमोरील राजीव गांधी भवन परिसरात मोठ्या प्रमाणावर पाणी साचले होते. वसंतराव कानिटकर उद्यानासमोरील रस्ता, पिंपळगाव बहुला येथील पूल तसेच शहरातील विविध भागांतील रस्त्यांचे नुकसान झाल्याने नागरिकांना मोठ्या अडचणींचा सामना करावा लागला. (Nashik Kumbh Works Controversy By BJP Corporator)
घटनेची गंभीर दखल घेत महापौर, उपमहापौर आणि महापालिका आयुक्त यांनी विविध भागांची पाहणी केली. कंत्राटदारांच्या निष्काळजीपणामुळे नागरिकांना त्रास झाल्याची नोंद घेत संबंधितांना तातडीने परिस्थिती सुरळीत करण्याचे निर्देश देण्यात आले आहेत.
दरम्यान, मुख्यमंत्री देवेंद्र फडणवीस यांनी नाशिकमध्ये अतिवृष्टीची शक्यता वर्तवली होती. ढगफुटीचा धोका टळला असला तरी सलग झालेल्या मुसळधार पावसामुळे शहर आणि ग्रामीण भागातील जनजीवन मोठ्या प्रमाणावर विस्कळीत झाले आहे. यामुळे कुंभमेळ्याच्या विकासकामांच्या गुणवत्ता, नियोजन आणि अंमलबजावणीबाबतचा वाद अधिकच तीव्र झाला आहे.
MHDU News : Vishal BHadane Nashik Kumbh Works Controversy By BJP Corporator