Trimbakeshwar-Khodala Road Washed Away
नाशिक | प्रतिनिधी
नाशिक जिल्ह्यात गेल्या काही दिवसांपासून सुरू असलेल्या मुसळधार पावसाचा फटका आता जनजीवनावर स्पष्टपणे जाणवू लागला आहे. विशेषतः त्र्यंबकेश्वर आणि परिसरात झालेल्या संततधार पावसामुळे अनेक ठिकाणी पूरसदृश परिस्थिती निर्माण झाली असून रस्ते, पूल आणि वाहतुकीवर मोठा परिणाम झाला आहे.
याच पार्श्वभूमीवर त्र्यंबकेश्वर-खोडाळा मार्गावरील नव्याने उभारण्यात येत असलेल्या पुलाच्या शेजारी तयार करण्यात आलेला तात्पुरता कच्चा रस्ता (भराव) पाण्याच्या प्रचंड प्रवाहात वाहून गेला आहे. त्यामुळे हा महत्त्वाचा मार्ग पूर्णपणे बंद झाला असून तब्बल ४० हून अधिक गावांचा त्र्यंबकेश्वर आणि नाशिक शहराशी असलेला संपर्क तुटला आहे.
नवीन पुलाच्या कामादरम्यान घडली घटना
मिळालेल्या माहितीनुसार, त्र्यंबकेश्वर-खोडाळा दरम्यान नवीन रस्ता आणि पुलाचे काम सुरू आहे. पुलाचे बांधकाम सुरू असल्यामुळे वाहतूक सुरू ठेवण्यासाठी कंत्राटदाराने मुख्य पुलाच्या बाजूला माती, मुरूम आणि दगडांचा भराव टाकून पर्यायी मार्ग तयार केला होता.
मात्र, गेल्या काही दिवसांपासून सुरू असलेल्या मुसळधार पावसामुळे नदी-नाल्यांतील पाण्याचा प्रवाह प्रचंड वाढला. या वेगवान पाण्याच्या लोंढ्यामुळे तात्पुरत्या भरावाला मोठे भगदाड पडले आणि काही क्षणांतच संपूर्ण कच्चा रस्ता वाहून गेला.
प्रशासन घटनास्थळी
घटनेची माहिती मिळताच स्थानिक प्रशासन तसेच सार्वजनिक बांधकाम विभागाचे अधिकारी घटनास्थळी दाखल झाले. परिस्थितीची पाहणी सुरू असून पर्यायी मार्ग उपलब्ध करून देण्याबाबत हालचाली सुरू आहेत. मात्र, रस्ता पूर्णपणे वाहून गेल्याने या मार्गावरील वाहतूक सध्या पूर्णपणे ठप्प झाली आहे.
४० हून अधिक गावांवर परिणाम
त्र्यंबकेश्वर-खोडाळा मार्ग हा परिसरातील ग्रामीण भागासाठी अत्यंत महत्त्वाचा दुवा मानला जातो. हा मार्ग बंद झाल्यामुळे ४० हून अधिक गावांचा संपर्क तुटला असून नागरिकांना मोठ्या अडचणींचा सामना करावा लागत आहे.
दूध उत्पादक शेतकऱ्यांना दूध संकलन केंद्रापर्यंत पोहोचण्यात अडचणी येत आहेत. शेतमालाची वाहतूक ठप्प झाली असून शाळकरी विद्यार्थी, नोकरदार, रुग्ण तसेच दैनंदिन प्रवास करणाऱ्या नागरिकांचे हाल होत आहेत.
प्रशासनाकडून नागरिकांना आवश्यक नसल्यास या मार्गावर प्रवास टाळण्याचे आवाहन करण्यात येत असून परिस्थितीवर सातत्याने लक्ष ठेवले जात आहे.
Trimbakeshwar-Khodala Road Washed Away
तुकाराम मुंढेंचा दणका! सिन्नरसह जिल्ह्यात किराणा दुकानांतून खुले खाद्यतेल व विनालेबल फरसाण वर कारवाई