Nashik Crime Remote Number Plate Gutkha Smuggling Devla
देवळा (नाशिक) | MHDU News
अवैध गुटखा तस्करीसाठी तस्करांकडून दिवसेंदिवस अत्याधुनिक तंत्रज्ञानाचा वापर केला जात असल्याचे आणखी एक धक्कादायक उदाहरण नाशिक जिल्ह्यात समोर आले आहे. देवळा तालुक्यातील विठेवाडी येथे ग्रामस्थांच्या सतर्कतेमुळे रिमोट कंट्रोलच्या सहाय्याने नंबर प्लेट लपविणाऱ्या कारमधून सुरू असलेली हायटेक गुटखा तस्करी उघडकीस आली. या प्रकरणात देवळा पोलिसांनी सुमारे ₹14.92 लाखांचा मुद्देमाल जप्त करत एका संशयिताला अटक केली असून मुख्य आरोपी अद्याप फरार आहे.
प्राथमिक तपासात समोर आलेल्या माहितीनुसार, पोलिसांची दिशाभूल करण्यासाठी वाहनाच्या पुढील आणि मागील नंबर प्लेटवर विशेष यंत्रणा बसविण्यात आली होती. रिमोटवरील बटण दाबताच काळ्या रंगाचा पडदा नंबर प्लेटवर सरकून ती पूर्णपणे झाकली जात होती. त्यामुळे रस्त्यावरील पोलीस तपासणी तसेच सीसीटीव्ही कॅमेऱ्यांमध्ये वाहनाचा क्रमांक दिसत नव्हता. ही युक्ती वापरून वाहन अनेकदा पोलिसांच्या नजरेतून निसटत असल्याचा संशय तपासात व्यक्त करण्यात आला आहे.
ही कारवाई बुधवारी रात्री देवळा तालुक्यातील विठेवाडी येथील आहेर वस्ती परिसरात घडली. संशयास्पद हालचाली करणारी मारुती सुझुकी इर्टिगा कार ग्रामस्थांच्या नजरेस पडताच त्यांनी तत्परता दाखवत वाहन अडवले आणि देवळा पोलिसांना माहिती दिली. त्यानंतर पोलिसांनी घटनास्थळी धाव घेत वाहन ताब्यात घेतले.
अन्न सुरक्षा अधिकारी चेतन परदेशी यांनी दिलेल्या फिर्यादीनंतर वाहनाची सखोल तपासणी करण्यात आली. तपासणीदरम्यान कारमधून मोठ्या प्रमाणात विमल पान मसाला आणि V-1 तंबाखूचा साठा आढळून आला. जप्त करण्यात आलेल्या गुटख्याची किंमत ₹4,92,200 इतकी असून, ₹10 लाख किमतीच्या मारुती सुझुकी इर्टिगा कारसह एकूण ₹14,92,200 चा मुद्देमाल पोलिसांनी जप्त केला आहे.
या प्रकरणी हेमंत प्रभाकर पवार याला अटक करण्यात आली असून त्याच्याविरुद्ध पुढील कायदेशीर कारवाई सुरू आहे. दरम्यान, या अवैध गुटखा तस्करीमागील मुख्य सूत्रधार मानला जाणारा कुणाल संजय मेने हा पोलिसांच्या हाती लागण्यापूर्वीच पसार झाला. त्याचा शोध सुरू असून लवकरच त्याला अटक केली जाईल, असा विश्वास तपास यंत्रणांनी व्यक्त केला आहे.
पोलिसांच्या माहितीनुसार, फरार आरोपी कुणाल मेने याच्याविरुद्ध यापूर्वीच देवळा, वणी आणि दिंडोरी पोलीस ठाण्यांमध्ये गुटखा तस्करीचे पाच गंभीर गुन्हे दाखल आहेत. तो संघटित पद्धतीने हा अवैध व्यवसाय करत असल्याचा संशय व्यक्त करण्यात आला आहे. त्यामुळे त्याच्याविरुद्ध महाराष्ट्र संघटित गुन्हेगारी नियंत्रण कायदा (MCOCA) अंतर्गत कठोर कारवाई करण्याची मागणी अन्न व औषध प्रशासनाने (FDA) केली आहे.
या संपूर्ण प्रकरणाचा पुढील तपास देवळा पोलीस करत असून, फरार आरोपीचा शोध सुरू आहे.
MHDU News : Vishal Bhadane Nashik Crime Remote Number Plate Gutkha Smuggling Devla
विद्यार्थ्यांना मोठा दिलासा! ४१ वी SET परीक्षा पुढे ढकलली; आता ‘या’ दिवशी होणार परीक्षा
[…] […]