Operation Tiger Nashik Political Update
राज्यातील राजकीय घडामोडींना पुन्हा वेग आला असून, शिवसेना (उद्धव बाळासाहेब ठाकरे) पक्षातील आणखी काही लोकप्रतिनिधी शिंदे गटाच्या संपर्कात असल्याची चर्चा सध्या राजकीय वर्तुळात रंगली आहे. ‘ऑपरेशन टायगर’ पुन्हा सक्रिय झाल्याचा दावा शिंदे गटातील काही नेत्यांकडून करण्यात येत असून, नाशिक महानगरपालिकेतील ठाकरे गटाचे तब्बल १० ते १२ नगरसेवक शिंदे गटाशी संपर्कात असल्याची माहिती सूत्रांकडून समोर येत आहे.
यापूर्वी ठाकरे गटातील काही खासदारांनी मुख्यमंत्री एकनाथ शिंदे यांच्या नेतृत्वाखालील शिवसेनेत प्रवेश केला होता. त्यानंतर काही आमदारही शिंदे गटात जाणार असल्याच्या चर्चांना उधाण आले होते. आता त्याच पार्श्वभूमीवर नाशिक महापालिकेतील नगरसेवकांच्या संभाव्य पक्षांतराच्या चर्चेमुळे स्थानिक राजकारणात मोठी खळबळ उडाली आहे.
सूत्रांच्या माहितीनुसार, संबंधित नगरसेवकांच्या वरिष्ठ नेत्यांसोबत अलीकडील काळात काही बैठका झाल्या असून, संभाव्य पक्षप्रवेशासंदर्भात प्राथमिक चर्चा झाल्याचे सांगितले जात आहे. त्यामुळे येत्या काही दिवसांत राजकीय समीकरणांमध्ये मोठे बदल होण्याची शक्यता व्यक्त केली जात आहे.
दरम्यान, या नगरसेवकांना प्रभागनिहाय पाच कोटी रुपयांच्या विशेष विकास निधीचे आमिष दाखवण्यात आल्याची चर्चा देखील राजकीय वर्तुळात सुरू आहे. तसेच ठाकरे गटातील एका वरिष्ठ नेत्याशीही शिंदे गटाकडून संवाद झाल्याचे बोलले जात असल्याने ‘ऑपरेशन टायगर’च्या चर्चांना आणखी बळ मिळाले आहे.
सध्या नाशिक महानगरपालिकेत शिवसेना (उद्धव बाळासाहेब ठाकरे) पक्षाचे १५ नगरसेवक आहेत. त्यापैकी १० ते १२ नगरसेवक शिंदे गटाच्या संपर्कात असल्याचा दावा केला जात असला, तरी या दाव्याला संबंधित नगरसेवक किंवा दोन्ही पक्षांकडून अद्याप अधिकृत दुजोरा देण्यात आलेला नाही. त्यामुळे या चर्चांकडे राजकीय घडामोडींच्या पार्श्वभूमीवर पाहिले जात आहे.
दरम्यान, गुरुवारी ठाकरे गटाचे जिल्हाप्रमुख डी. जी. सूर्यवंशी, महानगरप्रमुख प्रथमेश गिते आणि मनपा गटनेते केशव पोरजे यांच्या नेतृत्वाखालील शिष्टमंडळाने महापालिका आयुक्तांची भेट घेत शहरातील रस्त्यांची दुरवस्था, खड्डे, पाणी साचणे आणि इतर नागरी समस्यांबाबत निवेदन सादर केले. त्यामुळे एका बाजूला नागरी प्रश्नांवर आक्रमक भूमिका आणि दुसऱ्या बाजूला संभाव्य पक्षांतराच्या चर्चांमुळे नाशिकचे राजकारण पुन्हा एकदा चर्चेच्या केंद्रस्थानी आले आहे.
Operation Tiger Nashik Political Update
सचिन अहिर शिंदे गटात; विधान परिषदेच्या उपसभापतीपदासाठी अर्ज, ठाकरे गटाला मोठा धक्का
[…] […]
[…] […]