नाशिक :
त्र्यंबकेश्वर येथे सिंहस्थ कुंभमेळा बैठकीच्या वार्तांकनासाठी गेलेल्या दूरचित्रवाणी पत्रकारांवर प्रवेश व वाहन शुल्क वसुली करणाऱ्या सराईत गुन्हेगारांनी हल्ला केला. या गंभीर घटनेनंतर नाशिक प्रेस क्लब आणि नाशिक शहर पत्रकार संघाने जिल्हाधिकारी जलज शर्मा यांची भेट घेतली. पत्रकारांनी दोषींवर कठोर कारवाई करण्याची, त्र्यंबकेश्वरमधील प्रवेश व वाहन शुल्क त्वरित रद्द करण्याची आणि पत्रकार संरक्षण कायद्याची तातडीने अंमलबजावणी करण्याची मागणी केली. जिल्हाधिकाऱ्यांनी या मागण्यांबाबत सकारात्मकता दर्शवली व कारवाईची ग्वाही दिली.
निवेदनानुसार, त्र्यंबकेश्वर नगरपालिकेचे प्रवेश शुल्क वसुलीचे कंत्राट सुमारे १.०८ कोटी रुपयांचे असून ते मुंबईस्थित व्यक्तीला देण्यात आले आहे. या कंत्राटदाराने दोन उपकंत्राटदार नेमले व त्यांनी वसुलीसाठी गुन्हेगारांचा वापर केल्याचा आरोप करण्यात आला आहे. त्यामुळे पालिकेच्या तत्कालीन मुख्य कार्यकारी अधिकाऱ्यांची चौकशी करून घोटाळा आढळल्यास कारवाई करावी, अशी मागणी करण्यात आली.
पत्रकारांनी असा इशारा दिला की, आगामी सिंहस्थादरम्यान समाजविघातक मंडळी भाविकांना लुटण्यासाठी सक्रिय होऊ शकतात. त्यामुळे नाशिकमधील टोल, पार्किंग, स्वच्छतेचे ठेके व त्यातील कर्मचाऱ्यांची काटेकोर तपासणी आवश्यक असल्याचे त्यांनी स्पष्ट केले.
https://mhdu.in/journalist-attack-trimbakeshwar-nashik/: Nashik News : Journalist Attack ; पत्रकार संरक्षण कायद्याच्या अंमलबजावणीची जोरदार मागणीउपस्थित संपादक व मान्यवर
या निवेदनावेळी ‘सकाळ’चे ( https://dhunt.in/11WoFn )उत्तर महाराष्ट्र निवासी संपादक अभय सुपेकर, ‘दिव्य मराठी’चे जयप्रकाश पवार व दीप्ती राऊत, ‘देशदूत’चे शैलेंद्र तनपुरे, ‘लोकमत’चे अभिजित कुलकर्णी, ‘पुण्यनगरी’चे किरण लोखंडे, ‘पुढारी’चे राहुल रनाळकर यांसह नाशिक पत्रकार संघाचे अध्यक्ष संपत देवगिरे, टीव्ही-९ चे ब्युरो चीफ चंदन पुजाधिकारी आणि वरिष्ठ पत्रकार उपस्थित होते.
जिल्हाधिकाऱ्यांची प्रतिक्रिया
जिल्हाधिकारी जलज शर्मा यांनी ही घटना अयोग्य असल्याचे सांगत पत्रकार आणि शासकीय यंत्रणांची संयुक्त कार्यशाळा घेण्याची घोषणा केली. या कार्यशाळेत पत्रकारांचे हक्क व अधिकार याबाबत यंत्रणांना अवगत केले जाणार आहे.
राजकीय पक्षांचा निषेध
राष्ट्रवादी काँग्रेस : पत्रकारांवर हल्ल्याचा निषेध करून धार्मिक स्थळांवरील वाहनतळांचे ठेके रद्द करून ते बचतगटांना द्यावेत, अशी मागणी.
शिवसेना (उबाठा) : दोषींवर कठोर कारवाई, कुंभमेळा समितीत साधू-महंतांचा समावेश, पालकमंत्री नेमणूक, निधीचा पारदर्शक हिशेब अशा मागण्या.
पत्रकार संघटना : सर्व हल्लेखोरांना तातडीने अटक, पत्रकारांवरील खोटे गुन्हे मागे घेणे, ठोस सुरक्षा धोरण राबवणे यासाठी जिल्हाधिकाऱ्यांना निवेदन.
बैठकीतील महत्त्वाचे निर्णय
त्र्यंबकेश्वरमध्ये शासकीय वाहनतळांवर स्पष्ट फलक लावले जाणार
दर्शनासाठी ऑनलाइन प्रणाली सुरू होणार
पत्रकारांसाठी विशेष पासेस व सुरक्षा सुविधा लागू होणार
अशा घटनांची पुनरावृत्ती टाळण्यासाठी सर्व विभागांना सूचना देण्यात येणार