Dr Nilesh Jejurkar Police Custody Nashik
नाशिक : आयुर्वेदतज्ज्ञ डॉ. मनीषा जेजुरकर यांच्या संशयास्पद मृत्यूप्रकरणी त्यांचे पती आणि मानसोपचारतज्ज्ञ डॉ. नीलेश जेजुरकर यांना पोलिसांनी ताब्यात घेतले आहे. सर्वोच्च न्यायालयाने अटकपूर्व जामीन अर्ज फेटाळल्यानंतर डॉ. जेजुरकर यांनी पोलिसांसमोर शरणागती पत्करली. त्यानंतर पोलिसांनी त्यांना ताब्यात घेत कायदेशीर प्रक्रिया सुरू केली.
या प्रकरणात डॉ. नीलेश जेजुरकर यांनी मुंबई उच्च न्यायालयानंतर सर्वोच्च न्यायालयात अटकपूर्व जामिनासाठी दाद मागितली होती. मात्र, सर्वोच्च न्यायालयाने गुरुवारी त्यांचा अर्ज फेटाळून पोलिसांसमोर शरण येण्याचे निर्देश दिले. त्यानंतर शुक्रवारी पोलिसांनी त्यांना ताब्यात घेतले.
ताब्यात घेतल्यानंतर पोलिसांनी डॉ. जेजुरकर यांची सविस्तर चौकशी केली. डॉ. मनीषा जेजुरकर यांच्या मृत्यूपूर्वी पती-पत्नीमध्ये काही वाद झाला होता का, घटनेच्या वेळी घरात नेमके कोण उपस्थित होते, तसेच घटनास्थळाची परिस्थिती काय होती, यासह विविध मुद्द्यांवर पोलिसांकडून माहिती घेण्यात आली. _Dr Nilesh Jejurkar Police Custody Nashik
प्राथमिक माहितीनुसार, डॉ. मनीषा जेजुरकर यांनी खिडकीला लावलेल्या दोरीच्या आधारे गळफास घेतल्याचे सांगण्यात आले होते. मात्र, मृत्यूच्या परिस्थितीबाबत पोलिसांकडून तपास सुरू असून, घटनास्थळावरील परिस्थिती आणि उपलब्ध पुराव्यांच्या आधारे पुढील तपास केला जात आहे.
दरम्यान, मुंबई उच्च न्यायालयाने १० सप्टेंबर रोजी डॉ. नीलेश जेजुरकर यांचा अटकपूर्व जामीन अर्ज फेटाळला होता. तपासाच्या दृष्टीने त्यांची कोठडीत चौकशी आवश्यक असल्याचे न्यायालयाने निरीक्षण नोंदवले होते. त्यानंतर त्यांनी सर्वोच्च न्यायालयात धाव घेतली; मात्र तेथेही अटकेपासून दिलासा मिळाला नाही. _ Dr Nilesh Jejurkar Police Custody Nashik
आता डॉ. नीलेश जेजुरकर यांना शनिवारी न्यायालयात हजर केले जाणार असून, पोलिसांकडून त्यांच्या कोठडीची मागणी केली जाते का आणि न्यायालय त्याबाबत काय निर्णय देते, याकडे लक्ष लागले आहे.
महत्त्वाचे : या प्रकरणाचा तपास सुरू असून, डॉ. नीलेश जेजुरकर यांच्यावरील आरोप न्यायालयीन प्रक्रियेत आहेत. दोष सिद्ध होईपर्यंत त्यांना कायद्यानुसार निर्दोष मानले जाते.
न्यूज महादूत जनबिंदू प्रतिनिधी : दीपक सरोदे _ Dr Nilesh Jejurkar Police Custody Nashik