Dutondya Maruti Flood Level Nashik 2026
नाशिक : नाशिकमध्ये मुसळधार पावसानंतर गोदावरी नदीने पुन्हा एकदा रौद्र रूप धारण केले असून, रामकुंड परिसरातील दुतोंड्या मारुतीच्या छातीपर्यंत पाणी पोहोचल्याने शहरातील पूरस्थितीची तीव्रता स्पष्ट झाली आहे. नाशिककरांसाठी ही केवळ एक मूर्ती नसून, गोदावरीच्या पुराचा दशकानुदशके वापरला जाणारा नैसर्गिक मापक आहे.
गोदाकाठावर पूर किती आहे, हा प्रश्न पडला की अनेकजण आजही “मारुतीच्या पायाला, कमरेला की छातीपर्यंत पाणी आलं?” अशीच विचारणा करतात. १९३९ च्या महापुरानंतर दुतोंड्या मारुतीचा पुराशी संबंध अधिक दृढ झाला. त्या महापुरात जुनी मूर्ती बाधित झाल्यानंतर १९४२ मध्ये सध्याच्या मूर्तीची प्राणप्रतिष्ठा करण्यात आली. तेव्हापासून गोदावरीच्या वाढत्या पाणीपातळीचा सर्वात ओळखीचा संदर्भ म्हणजे दुतोंड्या मारुती ठरला आहे.
यंदा छातीपर्यंत पाणी पोहोचल्याचे दृश्य समोर आल्यानंतर रामकुंड आणि गोदाघाट परिसरात नागरिकांची मोठी गर्दी झाली. अनेकांनी पूर पाहण्यासाठी घाटाकडे धाव घेतली. मात्र, काही तरुणांनी पुराच्या पाण्यात उतरून सेल्फी, रील्स आणि उड्या मारण्याचा प्रकार केल्याने पोलिसांना वारंवार हस्तक्षेप करावा लागला. धोकादायक भागात जाणाऱ्यांना रोखण्यासाठी पोलिस आणि प्रशासनाने सतत सूचना देत परिसरात गस्त वाढवली.
गोदावरीचा वेग वाढत असताना नदीकाठावरील अनेक घाट, पायऱ्या आणि मंदिर परिसर पाण्याखाली गेले. प्रशासनाने नागरिकांना नदीपात्रापासून सुरक्षित अंतर राखण्याचे आवाहन केले असून, अनावश्यक गर्दी टाळण्याचेही आवाहन करण्यात आले आहे.
दरम्यान, शहरातील विविध विकासकामे, विशेषतः सिंहस्थ कुंभमेळ्याच्या पार्श्वभूमीवर सुरू असलेली कामे आणि मुसळधार पावसामुळे निर्माण झालेल्या परिस्थितीवरून नागरिकांमध्ये तीव्र चर्चा सुरू झाली आहे. पहिल्याच जोरदार पावसात शहरातील व्यवस्थापनावर प्रश्नचिन्ह निर्माण झाल्याची भावना अनेक नागरिकांनी व्यक्त केली.
नाशिकमध्ये प्रत्येक पावसाळ्यात दुतोंड्या मारुतीकडे लागणारे पाणी हे केवळ श्रद्धेचे प्रतीक नसून, गोदावरीच्या वाढत्या रौद्ररूपाचा पहिला इशारा मानला जातो. यंदाही छातीपर्यंत पोहोचलेल्या पाण्याने नाशिककरांना पुन्हा एकदा पूरस्थितीची गंभीर जाणीव करून दिली आहे.
Dutondya Maruti Flood Level Nashik 2026
पडक्या वाड्यांच्या पाहणीनंतर तात्काळ उपाययोजनांचे आदेश
[…] […]