Nashik Ring Road Farmers With CM Meeting

नाशिक : नाशिक रिंगरोड प्रकल्पामुळे बाधित झालेल्या शेतकऱ्यांच्या प्रलंबित मागण्या आणि भूसंपादन प्रक्रियेतील विविध समस्यांवर तोडगा काढण्यासाठी उद्या, दि. ३ ऑक्टोबर २०२६ रोजी मुंबईतील ‘वर्षा’ शासकीय निवासस्थानी मुख्यमंत्री देवेंद्र फडणवीस यांच्या उपस्थितीत तातडीची बैठक आयोजित करण्यात आली आहे. पालकमंत्री गिरीश महाजन यांच्या मध्यस्थीने बैठक निश्चित झाल्यानंतर जिल्हाधिकारी कार्यालयासमोर प्रस्तावित करण्यात आलेले आत्मदहन आंदोलन तूर्तास स्थगित करण्यात आले आहे.

आज नाशिक जिल्हाधिकारी कार्यालयात पालकमंत्री गिरीश महाजन यांच्या प्रमुख उपस्थितीत रिंगरोड बाधित शेतकऱ्यांची आढावा बैठक घेण्यात आली. यावेळी छावा क्रांतिवीर सेनेचे संस्थापक अध्यक्ष करण गायकर, आमदार देवयानी फरांदे तसेच शेतकरी प्रतिनिधींनी भूसंपादन प्रक्रियेतील कथित अनियमितता, प्रशासनाकडून होत असल्याचा आरोप असलेली दिशाभूल आणि शेतकऱ्यांवर होणारे एकतर्फी निर्णय याबाबत कागदपत्रे व पुराव्यांसह आपली भूमिका मांडली. _ Nashik Ring Road Farmers With CM Meeting

रिंगरोडच्या अलाइनमेंटबाबत अद्याप स्पष्टता नसणे, जिरायती आणि बागायती जमिनींचे योग्य मूल्यांकन न होणे, मंजूर दरात परस्पर कपात करणे तसेच विविध आश्वासनांनंतरही प्रश्न प्रलंबित राहणे, या मुद्द्यांवर शेतकरी प्रतिनिधींनी नाराजी व्यक्त केली.

शेतकऱ्यांनी मांडलेल्या प्रश्नांची गंभीरता लक्षात घेऊन पालकमंत्री गिरीश महाजन यांनी तत्काळ मुख्यमंत्री देवेंद्र फडणवीस यांच्याशी दूरध्वनीवरून संपर्क साधून संपूर्ण परिस्थिती त्यांच्या निदर्शनास आणून दिली. त्यानंतर शेतकऱ्यांच्या मागण्यांवर सविस्तर चर्चा करण्यासाठी मुंबईत तातडीची बैठक घेण्याचे निश्चित करण्यात आले. _ Nashik Ring Road Farmers With CM Meeting

या बैठकीस विभागीय आयुक्त, जिल्हाधिकारी आयुष प्रसाद, कुंभमेळा आयुक्त, पोलीस आयुक्त, ग्रामीण पोलीस अधीक्षक, संबंधित सातही तालुक्यांचे प्रांताधिकारी, तसेच एमएसआयडीसी, नगररचना, सार्वजनिक बांधकाम विभाग आणि कृषी विभागातील वरिष्ठ अधिकाऱ्यांनी आवश्यक कागदपत्रे व पुराव्यांसह उपस्थित राहण्याचे निर्देश देण्यात आले आहेत.

मुख्यमंत्र्यांसोबतच्या बैठकीत शेतकऱ्यांच्या मागण्यांवर सकारात्मक चर्चा होऊन तोडगा निघेल, अशी अपेक्षा व्यक्त करत आत्मदहन आंदोलन तूर्तास स्थगित करण्याचा निर्णय घेण्यात आला आहे. मात्र, केवळ आश्वासनांवर समाधान न मानता प्रत्यक्ष निर्णय आणि त्याची प्रभावी अंमलबजावणी होणे आवश्यक आहे, अशी भूमिका शेतकरी प्रतिनिधींनी स्पष्ट केली. _ Nashik Ring Road Farmers With CM Meeting

उद्याच्या बैठकीत काय निर्णय होतो, यावर आंदोलनाची पुढील दिशा ठरविण्यात येणार असल्याचे करण गायकर यांनी सांगितले.

बैठकीस आमदार देवयानी फरांदे, छावा क्रांतिवीर सेना संस्थापक अध्यक्ष करण गायकर, नगरसेवक सुधाकर बडगुजर, नगरसेवक चंद्रकांत, नगरसेवक विश्वास नागरे, माजी नगरसेवक जगदीश पाटील तसेच शेतकरी प्रतिनिधी दीपक हगवणे, सुदर्शन पाटील, पंकज खताळे, सुदाम भावले, रवी पेखळे, सागर लोणे, प्रवीण पाटील, वैभव दळवी, विनायक ढेमसे यांच्यासह संबंधित गावांतील शेतकरी प्रतिनिधी उपस्थित होते.

_ Nashik Ring Road Farmers With CM Meeting

Nashik NAFED NCCF Onion Procurement Complaints : नाफेड-एनसीसीएफ कांदा खरेदी प्रक्रियेतील तक्रारी 8 ऑक्टोबरपर्यंत सादर करा; 9 ऑक्टोबरला खुली सुनावणी