Maratha Andolan on Sharad Pawar:
ओबीसी संघर्ष सेनेचे नेते लक्ष्मण हाके यांनी ३ सप्टेंबर २०२५ रोजी मुंबईत पत्रकार परिषद घेतली. त्यांनी गंभीर आरोप करत म्हटलं की, “शरद पवार कुटुंबीय आणि त्यांचे आमदार मराठा आंदोलनाला रसद व आर्थिक मदत पुरवतात.” हाके यांनी पुढे असा दावा केला की, हे आंदोलन म्हणजे ओबीसी आरक्षणावर हल्ला आहे आणि यामागे शरद पवार, सुप्रिया सुळे आणि रोहित पवार यांचा सहभाग आहे.
या आरोपांमुळे महाराष्ट्राच्या राजकारणात खळबळ माजली होती.
मनोज जरांगे यांचे उत्तर
या आरोपांना प्रत्युत्तर देताना मनोज जरांगे पाटील यांनी स्पष्ट केलं –
“आंदोलनामागे कुणाचाही हात असता, तर मराठा समाजाला आजवर एकही प्रमाणपत्र मिळालं नसतं. हे आंदोलन शुद्ध मराठा समाजाचं आहे. आम्हाला राजकारण नको, आम्हाला फक्त आरक्षण हवं आहे. जर इतर नेत्यांचा हात असता, तर आतापर्यंत गोंधळ आणि दंगल झाली असती. पण वाशीत अधिसूचना घेतल्यानंतर आम्ही शांततेने परतलो. आमचा लढा संयमानं सुरू आहे.”
पवार कुटुंबाचा उल्लेख
जरांगे यांनी पुढे सांगितलं –
“मी आज सत्य सांगतोय. हल्ला झाल्यानंतर आमच्या माय-माऊली रक्ताच्या थारोळ्यात पडल्या होत्या. त्या वेळी शरद पवारांपासून ठाकरे, काँग्रेस, भाजप, शिवसेना – सगळ्या पक्षांचे नेते आधार देण्यासाठी आले. ती माणुसकी होती. पण याचा अर्थ असा नाही की आंदोलनामागे कुणाचा हात आहे.”
सरकारला अल्टिमेटम
मनोज जरांगे यांनी पुन्हा एकदा सरकारला इशारा दिला आहे. ते म्हणाले –
“दसऱ्यापर्यंत कुणबी प्रमाणपत्र मिळालं पाहिजे. जर ते मिळालं नाही, तर दसऱ्यानंतर आम्ही भूमिका घेऊ. मग आम्ही थांबणार नाही. दोन वर्षं संयम ठेवला आहे, पण दसऱ्यानंतर तो संपेल. मात्र, मला विश्वास आहे की एकनाथ शिंदे, देवेंद्र फडणवीस आणि राधाकृष्ण विखे-पाटील अशी वेळ येऊ देणार नाहीत.”
आगामी अधिवेशन
यासोबतच जरांगे यांनी जाहीर केलं की, लवकरच दिल्लीमध्ये मराठा समाजाचं एक दिवसाचं अधिवेशन भरवण्यात येणार आहे. त्याची तारीख लवकरच कळवण्यात येईल.