Jalgaon Dcc Bank Investigation
जळगाव प्रतिनिधी | दि. ११ जुलै २०२६ | MHDU News
जळगाव जिल्हा मध्यवर्ती सहकारी बँकेच्या (JDC Bank) कारभाराविरोधात गेल्या सहा-सात वर्षांपासून विविध तक्रारी करण्यात आल्या असून, शासन, सहकार विभाग आणि सहकार आयुक्त कार्यालयाने वेळोवेळी चौकशीचे आदेश दिले, अहवाल सादर झाले आणि लेखी निर्देशही जारी करण्यात आले. मात्र, प्रत्यक्षात संबंधितांवर कोणतीही ठोस कारवाई झालेली नसल्याचा आरोप तक्रारदारांनी केला आहे.
झुरखेडा येथील लोकनियुक्त सरपंच सुरेशआप्पा पाटील यांनी बँकेतील कथित अनियमिततांबाबत सातत्याने तक्रारी दाखल केल्या आहेत. त्यांच्या मते, अनेक प्रकरणांमध्ये चौकशीत मुद्दे समोर आल्यानंतरही प्रशासनाकडून अपेक्षित कारवाई झालेली नाही.
१० कोटींच्या कथित कर्जप्रकरणावर प्रश्न
गुलाबराव बाबुराव देवकर यांनी घेतलेल्या कथित सुमारे १० कोटी रुपयांच्या कर्जप्रकरणाची चौकशी वरिष्ठ स्तरावरून करण्यात आली. तक्रारदारांच्या दाव्यानुसार चौकशी अहवालात आरोप सिद्ध झाल्यानंतरही कोणतीही प्रशासकीय कारवाई करण्यात आलेली नाही. तसेच हे प्रकरण सहकार मंत्र्यांकडे गेल्यानंतर स्थगिती देण्यात आल्याचा आरोपही करण्यात आला आहे.
‘निंबाह्य येणे’ व्याज वसुलीचा आरोप
१ ऑगस्ट २०१७ पासून लागू असलेल्या शासन निर्णयानुसार संबंधित लाभार्थ्यांकडून ‘निंबाह्य येणे’ व्याज आकारू नये, असे निर्देश असतानाही हजारो शेतकऱ्यांकडून हे व्याज वसूल करण्यात आल्याचा आरोप आहे. चौकशीनंतर व्याज परत करण्याचे निर्देश देण्यात आले होते. मात्र आजतागायत प्रभावी अंमलबजावणी झालेली नसल्याचा दावा करण्यात आला आहे.
अपात्र संचालक आणि कंत्राटी भरतीवरही आक्षेप
बँकेतील काही संचालक अपात्र ठरत असल्याची तक्रार सहकार आयुक्तांकडे करण्यात आली होती. त्यावर नियमानुसार कारवाईचे आदेशही देण्यात आले. तरीही अद्याप निर्णय झालेला नसल्याचा आरोप आहे.
याचदरम्यान संचालक मंडळाच्या वैधतेवर प्रश्नचिन्ह असताना कंत्राटी नोकरभरती प्रक्रिया राबविण्यात आल्याने या भरतीवरही प्रश्न उपस्थित करण्यात आले आहेत.
शेतकऱ्यांमध्ये नाराजी
चौकशी अहवाल, शासनाचे आदेश आणि वरिष्ठ अधिकाऱ्यांच्या निर्देशांनंतरही कारवाई न झाल्याने जिल्ह्यातील शेतकऱ्यांमध्ये नाराजी व्यक्त होत आहे. या प्रकरणातील अंतिम निर्णय आणि जबाबदारांवर होणाऱ्या कारवाईकडे संपूर्ण जिल्ह्याचे लक्ष लागले आहे.
टीप : या वृत्तातील आरोप संबंधित तक्रारींवर आधारित आहेत. संबंधित व्यक्ती किंवा संस्थेची अधिकृत भूमिका उपलब्ध झाल्यास तीही प्रसिद्ध करण्यात येईल.
Jalgaon Dcc Bank Investigation
जळगावात २२ ते २६ जुलैदरम्यान महसूल समाधान शिबिरांचे आयोजन
[…] जळगाव जिल्हा मध्यवर्ती सहकारी बँकेती… […]