Nashik Crime – जुने नाशिक प्रज्ञा नगर येथे वाहनांची तोडफोड; भद्रकाली पोलिसांनी तिघांना अटक करून परिसरातून धिंड काढली. पूर्ण माहिती येथे वाचा.
Nashik Crime : वाहनांची तोडफोड करणाऱ्या आरोपींची जुन्या नाशिकमधून धिंड
जुने नाशिक येथील नानावली प्रज्ञा नगर भागात पाच वाहनांची तोडफोड करण्यात आली. या घटनेत सहभागी असलेल्या पाच संशयितांपैकी तिघांना भद्रकाली गुन्हे शोध पथकाने ताब्यात घेतले असून इतर दोघे फरार आहेत. ताब्यात घेतलेल्या तिघांमध्ये गणेश गजानन हिरवळकर (वय २४), रोहन प्रकाश चौधरी (वय २६) आणि प्रतीक उर्फ ऋषिकेश दिलीप जावळे (वय २४) यांचा समावेश आहे. चौकशीत दोघे सराईत गुन्हेगार असल्याचेही समोर आले आहे.
संशयितांनी रस्त्याच्या कडेला उभ्या असलेल्या वाहनांची तोडफोड केली. तसेच कोयते, दगड आणि शस्त्रांचा वापर करून वाहनांवर व घरांवर दगडफेक केली. परिसरात वारंवार दहशत निर्माण करण्याचा प्रयत्न ते करत असल्याची माहिती मिळाली आहे.
भद्रकाली पोलिसांनी वरिष्ठ निरीक्षक राकेश चौधरी यांच्या मार्गदर्शनाखाली तिघा संशयितांची जुने नाशिक परिसरातून धिंड काढली. नानावली, गुमशहा बाबा चौक, अमरधाम रोड आणि शिवाजी चौक या भागातून काढलेल्या धिंडीमुळे नागरिकांमध्ये विश्वास निर्माण करण्याचा प्रयत्न करण्यात आला. पोलिसांनी नागरिकांना कुठल्याही प्रकारची भीती बाळगू नये आणि त्रास झाल्यास त्वरित संपर्क साधावा असे आवाहन केले.
ताब्यात घेतलेल्या तिघांना न्यायालयात हजर केले असता त्यांना १२ सप्टेंबरपर्यंत पोलिस कोठडी सुनावण्यात आली आहे. तर उर्वरित दोन फरार संशयितांचा शोध सुरू आहे.
या कारवाईमुळे पोलिस प्रशासनाने गुन्हेगारीवर कठोर भूमिका घेतली आहे. नागरिकांमध्ये निर्माण झालेली भीती कमी करण्यासाठी धिंड काढून पोलिसांनी ठोस संदेश दिला आहे.