Arbaz Shaikh Hospital FDA Action Solapur
सोलापूर | MHDU News
‘सैराट‘ चित्रपटातील ‘सल्या’ या भूमिकेमुळे लोकप्रिय झालेला अभिनेता अरबाज शेख याने सोशल मीडियावर शेअर केलेल्या भावनिक व्हिडिओनंतर सोलापूरमधील एका खासगी रुग्णालयाशी संबंधित मेडिकलविरोधात अन्न व औषध प्रशासन (FDA) ने मोठी कारवाई केली आहे. प्राथमिक तपासणीत नियमांचे उल्लंघन झाल्याचे आढळल्यानंतर संबंधित मेडिकलमधील औषध विक्रीला तात्पुरती स्थगिती देत मेडिकल सील करण्यात आले आहे.
अरबाज शेखने आपल्या वडिलांवर उपचार सुरू असताना रुग्णालयाशी संलग्न मेडिकलमधूनच औषधे खरेदी करण्यासाठी दबाव टाकण्यात आल्याचा आरोप केला होता. हा व्हिडिओ सोशल मीडियावर मोठ्या प्रमाणात व्हायरल झाल्यानंतर FDA अधिकाऱ्यांनी तत्काळ रुग्णालयाची पाहणी करून संबंधित मेडिकलची तपासणी केली.
तपासणीदरम्यान औषधांच्या प्रिस्क्रिप्शनशी संबंधित आवश्यक नोंदी अपूर्ण असल्याचे निदर्शनास आले. याशिवाय, रुग्णांना कोणत्याही अधिकृत बाहेरील मेडिकलमधून औषधे खरेदी करण्याचा अधिकार असल्याची माहिती देणारा अनिवार्य फलकही मेडिकलमध्ये नसल्याचे आढळले. संबंधित बाबी प्रचलित मार्गदर्शक सूचनांच्या विरोधात असल्याचे FDA अधिकाऱ्यांनी नमूद केले.
अरबाज शेखच्या म्हणण्यानुसार, त्यांच्या वडिलांना ब्रेन हॅमरेजनंतर उपचारासाठी सोलापूरमधील नोबल रुग्णालयात दाखल करण्यात आले होते. उपचारादरम्यान रुग्णालयातील मेडिकलमधूनच औषधे घ्यावी लागल्याचा आरोप त्यांनी केला. तसेच सुमारे ४० हजार रुपयांचे औषध बिल आकारण्यात आले, तर तीच औषधे बाहेरील मेडिकलमध्ये जवळपास २० हजार रुपयांत उपलब्ध झाली असती, असा दावा त्यांनी केला आहे. खासगी रुग्णालयांमध्ये रुग्णांची आर्थिक पिळवणूक होत असल्याचाही आरोप त्यांनी आपल्या व्हिडिओत केला.
दरम्यान, या सर्व आरोपांचे रुग्णालय प्रशासनाने खंडन केले आहे. रुग्णालयाचे प्रमुख डॉ. अमजद सय्यद यांनी रुग्णांना त्यांच्या मेडिकलमधूनच औषधे खरेदी करण्याचे कोणतेही बंधन नसल्याचे स्पष्ट केले. उपचाराचा संभाव्य खर्च आधीच सांगण्यात आला होता आणि डिस्चार्जनंतर अशा प्रकारचे आरोप का करण्यात आले, याची माहिती नसल्याचेही त्यांनी नमूद केले.
या प्रकरणानंतर FDA ने स्पष्ट इशारा देत सांगितले की, कोणत्याही रुग्णाला विशिष्ट मेडिकलमधूनच औषधे खरेदी करण्यास भाग पाडणे नियमबाह्य आहे. अशा तक्रारींची दखल घेऊन संबंधित रुग्णालये व मेडिकलविरोधात कठोर कारवाई केली जाईल. या घटनेमुळे खासगी रुग्णालयांमधील औषध विक्रीची प्रक्रिया, रुग्णांचे अधिकार आणि आरोग्य व्यवस्थेतील पारदर्शकता पुन्हा चर्चेच्या केंद्रस्थानी आली आहे.
Arbaz Shaikh Hospital FDA Action Solapur
ऑपरेशन टायगर पुन्हा चर्चेत? ठाकरे गटाचे १० ते १२ नगरसेवक शिंदे गटाच्या संपर्कात?
[…] ‘सैराट’ फेम अरबाज शेखच्या आरोपांनंतर… […]